“Kitabın görünməyən qəhrəmanları” adlı maarifləndirici və interaktiv tədbir təşkil olunub
23.04.2026
Ümumdünya Kitab və Müəlliflik Hüququ Günü münasibətilə Libraff kitab mağazaları şəbəkəsi tərəfindən “Kitabın görünməyən qəhrəmanları” adlı maarifləndirici və interaktiv tədbir təşkil olunub. Tədbirin əsas məqsədi kitabın yalnız oxucuya təqdim olunan son məhsul deyil, arxasında böyük bir komandanın dayandığı çoxşaxəli bir proses olduğunu göstərmək olub. Tədbir çərçivəsində nəşriyyat işi, çap prosesi, kitab marketinqi və müəllif hüquqları kimi mövzular geniş müzakirə edilib. Tədbirdə TEAS Press nəşriyyatının nümayəndələri, marketinq üzrə mütəxəssislər və müəllif hüquqları sahəsində çalışan ekspertlər iştirak ediblər. Spikerlər sırasında Əqli Mülkiyyət Hüquqlarının Təminatı Mərkəzinin direktorunun müşaviri Əliyev Əsəd, TEAS Press-in “3 alma” uşaq ədəbiyyatı brendinin rəhbəri Arzu Cəfərova, çapa məsul şəxs Rəşad İsmixanlı və Libraff və TEAS Press-in marketinq departamentinin rəhbəri Həmidə Süleymanova yer alıb. İlk çıxış edən natiq - Əqli Mülkiyyət Hüquqlarının Təminatı Mərkəzinin təmsilçisi Əliyev Əsəd qeyd edib ki, müəllif hüquqlarının qorunması yalnız hüquqi mexanizmlərlə deyil, eyni zamanda cəmiyyətin maarifləndirilməsi ilə də sıx bağlıdır. Eyni zamanda, o vurğulayıb ki, müəllif hüquqları pozulan şəxslər qanunvericiliyə uyğun olaraq müraciət edib öz hüquqlarını müdafiə edə bilərlər və bu sahədə artıq müəyyən uğurlu praktik nümunələr mövcuddur. TEAS Press-in “3 alma” nəşrlərinin meneceri Arzu Cəfərova kitabın ideyadan nəşrə qədər olan yolunda düzgün seçimlərin və balanslı yanaşmanın (mədəni dəyər və kommersiya) həlledici rol oynadığını vurğuladı. Çapa məsul şəxs olaraq TEAS Press nəşriyyatını təmsil edən Rəşad İsmixanlı kitabın keyfiyyətinin onun texniki hazırlanmasından - kağız, çap və cildləmə proseslərindən birbaşa asılı olduğunu qeyd etdi. Həm Libraff, həm TEAS Press-i təmsil edən marketing departamentinin rəhbəri Həmidə Süleymanova kitabın oxucuya çatmasında düzgün marketinq strategiyası və oxucu davranışının anlaşılmasının əsas rol oynadığını bildirdi. Tədbirin interaktiv hissəsində iştirakçılar spikerlərə suallar ünvanlayıb, ən maraqlı sual sahibləri isə xüsusi hədiyyələrlə mükafatlandırılıb. Bu yanaşma tədbirin dinamikliyini artırmaqla yanaşı, auditoriyanın fəal iştirakını da təmin edib. Tədbir iştirakçılar tərəfindən maraqla qarşılanıb və kitab sənayesinə fərqli baxış bucağı təqdim edib. Libraff və TEAS Press bundan sonra da kitabın və oxu mədəniyyətinin təşviqi istiqamətində müxtəlif layihələrlə çıxış etməyi planlaşdırır.