Oxumaq və unutmaq paradoksu

Bu kitab oxumağın və unutmağın paradoksu üzərində qurulmuş mətnlər toplusudur. Oxunanlar niyə yaddaşdan silinir, düşüncəni və dünyagörüşünü necə dəyişir? İnsan nəyi xatırlayır, nəyi unudur, bunlar necə baş verir? Müəllif sizinlə “söhbət”ə “Sivilizasiyanı quran nitq deyil, yazıdır” sözləri ilə başlayır. Danışıq dili bir anlıqdır, zəifdir və yaddaşdan tez silinir; yazı isə düşüncəni sabitləşdirib dərinləşdirir. Ədəbiyyat oxumasan, dil inkişaf etmir; dil inkişaf etməyəndə isə düşüncə formalaşmır. Bu baxımdan kitab oxumaq, oxunanlar üzərində düşünmək və düşüncələri yazmaq sivilizasiyanın inkişafının əsas mexanizmlərindən biridir. “Oxumaq və unutmaq paradoksu” müəllifin oxuduqları, yaşadıqları və yazdıqları arasında qurduğu uzunmüddətli daxili dialoqun məhsuludur. Burada fəlsəfə gündəlik həyatla, elm fərdi yaddaşla, ədəbiyyat isə insan təcrübəsi ilə qarşılaşır. Mətnlər xronoloji deyil, düşüncə ardıcıllığı ilə düzülüb. Hər yazı bir nəticə yox, bir dayanacaqdır. Bu kitabda müəllifin təmasda olduğu, dostluq etdiyi, yola çıxdığı xeyli maraqlı insan var. Oxuduqca onların həyatı və yazdıqları üzərində düşünəcək, oxuyarkən unutmağı itki kimi yox, düşüncənin təbii mərhələsi kimi görəcəksiniz. Bu kitab sadəcə faktlar və fikirlər yığını deyil, düşünmək və xatırlamaq üçün bir məşq imkanıdır.