Susan qadın

“Susan qadın” romanının əsas süjeti bir cinayətin açılması üzərində qurulub. Lakin bunun necə bir cinayət olması barədə suala oxucu özü cavab verəcək. Hər halda, ölümlə nəticələnmiş qorxunc bir cinayət baş verib və qatil axtarılır. Ərinin xəyanətindən xəbər tutan qüruru tapdanmış Əsmərin olduqca iztirablı həyatı tezliklə qanlı və sirli bir cinayətlə başa çatır. Qadın müəmmalı şəkildə ölür. Şübhələr və gümanlar min yerə gedir. Amma... Mürəkkəb sevgi və ailə münasibətlərinə ustalıqla toxunulan əsərdə bir çox oxucuların özünü görəcəyinə şübhə yoxdur. Romanın ikinci əsas qəhrəmanı yazıçının başqa romanlarından tanıdığımız istefada olan polis polkovniki, məşhur cinayət-axtarış eksperti Qanbay Qasımlıdır. Oxucular əsərdə onun apardığı maraqlı təhqiqatla bərabər, şəxsi həyatında baş verən bəzi kədərli yeniliklərlə də tanış ola biləcəklər.

“Susan qadın” müasir Azərbaycan nəsrində heç də tez-tez rast gəlmədiyimiz psixoloji detektiv janrında yazılmış olduqca cəlbedici bir əsərdir və ümid edirik ki, oxucular tərəfindən çox maraqla qarşılanacaq.